Komisioni Qendror i Zgjedhjeve vendosi sot të ndërpresë mandatet e dy deputetëve dhe një kryetari bashkie për shkak të problemeve me ligjin e dekriminalizimit. Përkatësisht, Dashamir Tahiri i PD, Shkëlqim Selami i LSI dhe Elvis Rroshi kryetar bashkie i PS-së. Reagimet kanë qenë të shpejta dhe në mbështetje të KQZ nga lideri i PD, Basha dhe nga ministri i LSI, Ylli Manjani si dhe nga amabasada amerikane.
Ndërsa pritej një reagim nga Kryeministri për shkarkimin e Elvis Rroshit, Edi Rama ka çuditur kur ka shkruar se “PD i rrokanisi kokën shqiptarëve për ligjin e dekriminalizimit dhe në fund e shqelmoi ligjin”. Ai e kishte fjalën për votimin në KQZ, ku 3 anëtarë të djathtë ishin kundër heqjes së mandatit të Dashamir Tahirit.
Por përtej sulmeve ndaj PD-së, ajo që pritet nga Rama është të përgjigjet nëse do të firmosë për largimin e Rroshit, pasi në bazë të ligjit vendimi i KQZ për ndërprerjen e mandatit të kreut të Bashkisë së Kavajës i shkon për firmën Kryeministrit Rama. Ndërsa për largimin e dy deputetëve duhet të firmosë kreu i Kuvendit Ilir Meta.
