TIRANE-PS dhe PD treguan zell të madh sot per heqjen e dekoratave, duke nxituar të fusin njëra një amendament dhe tjetra në rezolutë në rendin e ditës, në të fundit për këtë sezon parlamentar.
Pasi i dëgjoi dy krerët e grupeve, përkatësisht Gramoz Ruçi dhe Edi Paloka, kryetari i Parlamentit, Ilir Meta i rrëzoi të dy. Kështu nismat e tyre ligjore për të hequr dekoratat pas skandalit të medaljes për persekutorin Shyqyri Çoku shtyhen për në Janar.
Debati ne parlament
Edi Paloka tha se PD ka depozituar një projekt rezolutë për heqjen e dekoratave, titujve dhe medaljeve për ishzyrtarë të komunizmit, të etiketuar si xhelatët e diktaturës.
“Na u tha që të ulemi të përgatisim këtë rezolutë dhe ta shqyrtojmë në seancën e radhës. Sot ne kemi ardhur me një projektrezolutë si grup parlamentar për këtë çështje dhe kërkojmë që sot të miratohet në këtë parlament për t’i hapur rrugë dhe ngritjes së kuadrit ligjor për zgjidhjen përfundimtare të kësaj çështjeje. Kërkoj futjen e saj në rendin e ditës”, tha Paloka.
Pak para nisjes së seancës, Partia Socialiste bëri të ditur se kryeministri Rama dhe nënkryetari i grupit parlamentar, Taulant Balla kanë paraqitur një amendament në ligj për heqjen e dekoratave dhe medaljeve për ishbyroistët.
Gramoz Ruçi duke mbrojtur këtë nismë të Qeverisë tha se duhet të futet në rend të ditës në mënyrë të përshpejtuar.
Por Kryetari i Parlamentit, Ilir Meta pasi i dëgjoi të gjithë tha: Rezoluta e PD ende nuk është dorëzuar zyrtarisht, ndërsa amendamenti i PS nuk mund të miratohet pasi është një amendament tjetër sot që futet në mënyrë të përshpejtuar dhe nuk lejohen dy të tillë brenda një seance.
