Analisti Henri Çili thotë se është absurde të diskutosh për një qeveri teknike, në kohën kur na ndajnë edhe 4 muaj nga zgjedhjet e përgjithshme, dhe rreth 2 muaj nga fillimi i fushatës elektorale. Në rubrikën “Opinion” në “News24”, Çili u shpreh se, “edhe pse protestat janë e drejtë e qytetarëve dhe e opozitës, të kërkosh largimin e kryeministrit apo qeveri teknike, është e kotë, pasi zgjedhjet janë shumë afër”.
Ai shton se dy janë momentet e rëndësishme në këtë periudhë, se pari Rama duhet të japë garanci shtesë me ndihmën e ndërkombëtarëve për zgjedhje të lira e të ndershme; dhe së dyti opozita nuk duhet të investojë energji të kota në kërkesën për qeveri teknike.
“Ka disa situata reale që krijojnë shqetësim për zgjedhjet. Është me rëndësi që të korrigjohet aq sa është e mundur, dhe të garantohet një proces i rregullt. Kjo është e domosdoshme për të vijuar me reformat e rëndësishme, siç është ajo në drejtësi dhe dekriminalizimi”, tha Çili.
Sipas Çilit, protesta e opozitës përbën sens në kërkesën e saj legjitime për garantimin e zgjedhjeve të lira e të ndershme.
“Protesta për një qeveri teknike është pa kuptim kur jemi kaq pranë zgjedhjeve. Por duhet të bien dakord mes të gjitha palëve politike për të garantuar zgjedhje të lira e të ndershme. Pasi kjo tashmë është kthyer në një opsesion”, tha Çili./BW
