Është regjistruar në prokurori pista e hetimit për ngjarjen e së shtunës në mbrëmje ku 140 qytetarë që morën pjesë në mitingun e PD-së u helmuan nga faktorë ende të panjohur, mes tyre edhe lideri Lulzim Basha.
Policia e Tiranës ka dërguar dosjen në Prokurorinë e Tiranës me referimin se krimi që është kryer është ‘ndotje e ajrit’, për të cilën parashikohet dënimi me burgim 10 vjet.
Sipas policisë në përfundim të aktivitetit elektoral të PD-së, për zgjedhjet parlamentare 2017, 20 pjesëmarrës në të u regjistruan në kartela për ndihmë mjekësore, me simptomat e skuqjes së fytyrës, syve dhe qafës. Të tjerët janë paraqitur në spital për këshillim mjekësor, duke e çuar numrin e të dëmtuarve në 146.
Sakaq prokuroria nuk ka marrë për bazë referencën e policisë dhe ka regjistruar dosjen për një vepër tjetër, që i përket kapitullit të veprave që prekin zgjedhjet e lira. Prokuroria dyshon se, duke penguar një subjekt të zhvillojë rregullisht aktivitetin është konsumuar neni 325 (Pengimi i subjekteve zgjedhore).
