Nuk është zbuluar ende shkaku i helmimit masiv në mitingun e PD-së. Mjekësia Ligjore i ktheu përgjigje Prokurorisë se nuk ka kapacitete për të analizuar kampionet e marra nga analizat e gjakut, ndaj organi i akuzës ka kërkuar ndihmë në Gjermani. Ajo çka presin hetuesit nga Gjermania është: Se cila është lënda helmuese që shkaktoi irritim në sy dhe në lëkurë të mbi 150 personave në miting, mes tyre dhe kreu i PD-së, Lulzim Basha.
Sakaq ne media është folur se shkak mund të jenë edhe prozhektorët e ndriçimit. Ka qenë policia ajo që e ka ngritur këtë dyshim. Pritet që brenda 48 orëve të dalin edhe përgjigjet nëse janë apo jo prozhektorët shkaktarët e shqetësimeve. Në saje të një eksperimenti të zhvilluar me prozhektorët ekspertët kanë dalë në konkluzionin përfundimtar, i cili pritet t’i dërgohet Prokurorisë.
Paraprakisht thuhet se konkluzioni ka qenë se prozhektorët nuk e shkaktojnë problemin shëndetësor në formën dhe në masën që u është shfaqur tek personave pjesëmarrës në mitingun e PD.
Pikërisht bazuar në këtë përfundim që pritet t’i shkojë edhe me shkrim Prokurorisë, grupi i hetimit ka administruar analizat e gjakut të personave të dëmtuar, për të kuptuar se me çfarë janë helmuar të dëmtuarit.
