Ministria e Shëndetësisë dhe Mbrojtjes Sociale, ka reaguar për ngjarjen e përsëritur në shkollën e mesme, “Janaq Kilica” në Fier, ku disa nxënës janë helmuar këtë të mërkurë. Ata kanë shfaqur probleme me frymëmarrjen, shenja helmimi dhe të vjella dhe janë nisur me urgjencë në spital me ambulanca dhe me makina të rastit.
Ministria sqaron se sipas të dhënave të minutave të fundit nga spitali rajonal i Fierit, një grup prej 60 nxënësish janë paraqitur me shenja intoksikacioni, mes tyre dhe një pjesë edhe me neuroza paniku, që sipas mjekëve, janë të kuptueshme në këtë situatë.
Ministria shton më tej, se aktualisht në këtë spital po marrin trajtim 14 nxënës, të cilët janë në gjendje të stabilizuar shëndetësore, por po mbahen në observim nga mjekët.
Ministria sqaroi më herët se aktualisht, nuk ka të dhëna për ndotje të ajrit por shton se kjo analizë do të kryhet edhe nesër në orën 07.30 për të vendosur hapjen e shkollës dhe vazhdimin normal të procesit mësimor./Opinion.al
