Me dhjetëra nxënës të gjimnazit “Janaq Kilica” në Fier u paraqitën ditën e djeshme rreth orës 11 në Urgjencën e qytetit me simptoma të frymëmarrjes.
Sipas njoftimit të djeshëm të ministrisë së Arsimit ishin 42 nxënës që kishin marrë shërbimin mjekësor. Kjo gjendje shkaktoi kaos pasi në fillim nuk dihej se çfarë e kishte shkaktuar gjendjen e rënduar shëndetësore të nxënësve.
Më vonë policia njoftoi se nxënës të kësaj shkolle kishin hedhur sprajt piperi në ambientet e shkollës, çka kishte shkaktuar helmimin e nxënësve. Sot policia njofton se ka proceduar penalisht dy nxënës 15-vjeçarë të cilët janë përgjegjës për hedhjen e gazit helmues.
“Specialistët për Hetimin e Krimeve në Komisariatin e Policisë Fier, nën drejtimin e Prokurorisë Fier, zbardhën ngjarjen e ndodhur ditën e djeshme, ku si pasojë e përdorimit të një sprajti me lëndë gazi, në ambientet e brendshme të shkollës, disa nxënës shfaqën shqetësime me frymëmarrjen dhe pasi morën ndihmën e parë në Spitalin Rajonal Fier, u larguan për në banesë.
Në përfundim të veprimeve hetimore rezultoi se sprajti ishte përdorur nga 2 nxënës të kësaj shkolle, konkretisht A. M., 15 vjeç dhe A. H., 15 vjeç, të cilët u proceduan penalisht”, njofton policia.
Materialet i kaluan Prokurorisë pranë Gjykatës së Shkallës së Parë Fier, për veprat penale “Ndotja e ajrit” dhe “Prishja e qetësisë publike”. /Opinion.al
