Prej ditësh qarkullon në media lajmi i ndërtimit të dy HEC-ve mbi lumin Osum ç’ka ka hedhur alarmin për shkatërrimin e kanioneve dhe ujëvarave përgjatë rrjedhës së lumit. I pari që ka reaguar ka qenë ministri i Mjedisit Blendi Klosi. Në një lidhje të drejpërdrejtë me emisionin “Opinion” mbrëmjen e djeshme ai tha se koordinatat janë ndryshuar dhe për këtë do të ketë një investigim. Klosi gjithashtu premtoi se do ta anuloje lejen mjedisore për ndërtim në zonën turistike, pra aty ku dëmtohen ujëvarat.
“Historia është ndërtuar mbi një gënjeshtër, koordinatat e dhëna në lejen mjedisore janë të keqtrajtuara. Prandaj po ju them se kjo histori nuk mund të zgjidhet me një emision, pasi kjo është një histori që ne kemi hapur një investigim. Jemi ne ata që kemi ngritur probleme dhe ashtu siç e ka thënë edhe Ministria e Energjitikës qartë, në momentin që bie leja për ndikimin në mjedis, të cilën ne do t’a rrëzojmë dhe kjo nuk diskutohet. Në atë vendim dhe në atë pikë nuk ka asnjë shans që ai HEC të ndërtohet”, deklaroi ministri publikisht.
Zamo Spathara, drejtuesi i Federatës “Rafting Albania” po kështu në një lidhje për emisionin “Opinion” deklaroi se gjurma për ndërtimin e dy HEC-eve, përveçse është devijuar, prek dhe 3 prej ujëvarave, të cilat janë elemente të atraksionit turistik në kanionin e Osumit, i cili ka edhe statusin monument natyre.
Vlerësimi i ndikimit mjedisor është një nga lejet më të rëndësishme për miratimin e një projekti. Kjo leje lëshohet nga agjencia kombëtare e mjedisit dhe duhet të certifikojë projekti për impaktin mjedisor. Sipas dokumenteve, rezulton se leja për dy HEC-et mbi kanionin e Osumit është dhënë në mars të vitit 2015 me firmën e ish drejtorit Julian Beqiraj. Por sipas Agjencisë së zonave të mbrojtura parregullsitë ligjore në leje dhe ndërrimi i koordinatave ku do të ndërtohen HEC-et e bëjnë lejen të paligjshme.
Ndërkohë që pas publikimi të lajmit ka reaguar edhe Ministria e Infrastrukturës dhe Energjisë, e cila ka vënë në dukje se është në komunikim të vazhdueshëm me Ministrinë e Mjedisit dhe Turizmit, nga e cila ka kërkuar verifikimin e lejes mjedisore të lëshuar nga ky institucion. “Në momentin që Ministria e Mjedisit do të konstatojë parregullsi në lejen e lëshuar nga ky institucion dhe do kryejë revokimin e kësaj leje, Ministria e Infrastrukturës dhe Energjisë mund të fillojë procedurat për prishjen e kontratës bazuar mbi legjislacionin përkatës. Ne funksion të shqyrtimit të këtij rasti, Ministria e Infrastrukturës ka shprehur gatishmërinë për krijimin e një grupi të përbashkët pune në nivel teknik mes dy ministrive”, thuhet në reagimin e ministrisë së Infrastrukturës dhe Energjisë.
