Presidenti i Kosovës Hashim Thaçi ende nuk ka reaguar pas ngritjes së aktakuzës nga zyra e prokurorit special.
Megjithatë ai ka zgjedhur të flasë përmes simbolikës. Sot Thaçi ka ndryshuar “cover” foton në profilin e tij zyrtar në Facebook duke vendosur imazhin e stemës së UÇK-së.
Me këtë veprim Presidenti i Kosovës tregon mbështetjen e tij ndaj luftës për liri të UÇK-së.
Ndonëse nuk është shprehur rreth kësaj ngjarjeje, Thaçi i ka komunikuar të dërguartit të Posaçëm të Presidentit të SHBA, Richard Grenell, se ai nuk do të jetë i pranishëm në takimin e Uashingtonit pa u sqaruar fillimisht akuzat ndaj tij.
Zyra e Prokurorit të Specializuar, ka njoftuar se më 24 prill u ka dërguar Dhomave të Specializuara të Kosovës, me seli në Hagë, një aktakuzë me dhjetë pika për shqyrtim, në të cilën presidenti Thaçi, kryetari i Partisë Demokratike të Kosovës, Kadri Veseli dhe të tjerë, akuzohen për një sërë krimesh kundër njerëzimit dhe krimesh lufte ndër të cilat, vrasje e paligjshme, zhdukje e detyruar e personave, përndjekje dhe tortura.
Akuzat ndaj Thaçit janë komentuar se mund të komprometojnë edhe misionin e UÇK-së gjatë luftës dhe kjo mund të vështirësojë pozitat e Kosovës në dialogun me Serbinë.
Në një reagim të tijin, ish-Kryeprokurori i Task Forcës Speciale Hetuese të Bashkimit Evropian në 2011, Ambasadori Clint Williamson thotë se akuzat në këtë proces janë ndaj individit dhe jo ndaj UÇK-së. /Opinion.al
