Ministri i Punëve të Jashtme, Igli Hasani nuk e sheh Bashkimin Europian të zhveshur nga përgjegjësia për zgjidhjen krizave si ajo në Lindjen e Mesme apo në Ukrainë.
I ftuar në një nga panelet e Forumit të Diplomacisë në Antalia, ai vuri theksin në përpjekjet e BE për t’u bërë aktor global.
“BE ka potencialin për t’u bërë një lojtar i vërtetë global dhe nuk mund t’i shmanget më zgjedhjeve të vështira. Aftësia e Unionit për të formësuar tranzicionet fillon në fqinjësinë e tij të afërt dhe zgjerimi është çelësi për të arritur këtë qëllim”, tha Hasani.
Në ndërhyrjet e tij në panelin “Aftësia e BE për të formësuar tranzicionet globale”, Hasani shprehu shqetësimin e tij dhe faktin se institucionet ndërkombëtare nuk po tregojnë aftësi për t’u përshtatur me zhvillimet që ka sjellë koha dekadat e fundit.
“Multilateralizmi po vuan specifikisht në dy dekadat e fundit. Kemi disa organizata ndërkombëtare që nuk po japin atë që pritet. Ne jemi ende zona gri në stomakun e Evropës. Jemi rrethuar nga një kufi i BE, por ende nuk jemi të integruar. Ende duke luftuar për të zhvilluar tre elementet: demokracinë liberale bazuar në sundimin e ligjit, ekonominë e tregut të lirë dhe lirinë dhe të drejtat themelore të njeriut”, tha Hasani./Opinion.al
