Hasan Halilaj nga kryetar i një bashkie të vogël u bë personazh kur Blushi shkroi shkrimin e famshëm “Rilindja po hasanizon Shqipërinë”. Hasan Halilaj kishte shërbyer për dy mandate si kryetar bashkie i Kukësit i zgjedhur nga PD dhe garonte për herë të tretë në 2015 me koalicionin PS-LSI.
Sot Hasan Halilaj është nën akuzë për shpërdorim detyre dhe me kërkesë të Prokurorisë, gjykata ka caktuar masën e sigurisë “arrest në burg”. Policia e ka shpallur menjeherë në kërkim ish – Kryetarin e Bashkisë së Kukësit.
Përpos Halilit në bankën e të akuzuarit do të ulen edhe: Mirdash Hoxha, ish – Drejtor i Drejtorisë Rajonale të Tatimeve, Lekë Deda, ish – drejtor i Financës, Gëzim Ukperaj, ish – Drejtor i Borxhit në Drejtorinë Rajonale të Tatimeve.
Këta persona bashkë me ish-kryetarin Halilaj akuzohen se në bashkëpunim me njëri – tjetrin, kanë kryer një seri veprimesh fiktive, duke e regjistruar Bashkinë Kukës si aksioneve në shoqërinë “Klubi i Futbolli Kukës” sh.a., për të cilën më pas kanë paguar në mënyrë të paligjshme, në formë sponsorizimi, në periudhën 2011 – 2015 rreth 45 milionë lekë të reja.
Këtë shumë, Bashkia e Kukësit e ka siguruar, duke mos paguar kontributet shoqërore dhe shëndetësore për pjesën më të madhe të punonjësve në varësi të institucionit.
Prokuroria e Kukësit i nisi hetimin në Nëntor 2015, në bazë të një kallëzimi të Bashkisë së Kukësit, në të cilën ishin ngritur dyshime për veprime të paligjshme nga ana e ish – drejtuesve të këtij institucioni, të cilët ishin larguar pas zgjedhjeve lokale të Qershorit 2015.
Nga hetimi i deritanishëm i organit të akuzës, rezultoi se:
– Shoqëria “Klubi i Futbollit Kukësi” sh.a është krijuar në vitin 2011, si një shoqëri tërësisht private. Në vitin 2012, me një vendim fiktiv, me kërkesë të Kryetarit të Bashkisë në atë kohë, Bashkia Kukës regjistroi si aksionere e kësaj shoqërie, pa asnjë bazë ligjore.
– Pas regjistrimit fiktiv si aksionere në këtë shoqëri private, Bashkia e Kukësit ka dhënë në formën e sponsorizimit për ekipin e futbollit mbi 45 milionë lekë të reja. Hetimi ka provuar se këto pagesa janë kryer tërësisht në kundërshtim me ligjin.
– Në vijim të hetimeve, Prokuroria konstatoi se shuma e paguar në formën e sponsorizimit për ekipin e futbollit është marrë nga fondi i përcaktuar për pagesën e detyrimeve shoqërore dhe shëndetësore të pjesës më të madhe të punonjësve që janë të regjistruar në ndërmarrjet e Bashkisë. Nga verifikimet ka rezultuar se për periudhën 2011-2015, shumë punonjës kanë marrë pagën, por nuk figuron të kenë të derdhura kontributet e detyrueshme, të cilat dorëzohen në Drejtorinë e Tatimeve nga ana e punëdhënësit (Bashkia në rastin konkret).
– Po ashtu, rezulton se Bashkia e Kukësit, për periudhën objekt-hetimi, ka qenë në dijeni të borxhit të akumuluar për shkak të mospagesës së detyrimeve. Megjithatë, si nga ana e Bashkisë, ashtu edhe nga Drejtoria Rajonale e Tatimeve, nuk është ndërmarrë asnjë veprim ligjor për të rikthyer normalitetin financiar.
Për më tepër, pavarësisht rritjes së borxhit nga viti në vit, rezulton se organika e Bashkisë është rritur periodikisht, duke shtuar ndjeshëm detyrimin që institucioni kishte ndaj administratës tatimore. Edhe kjo e fundit, megjithëse ka qenë në dijeni të situatës anormale, nuk ka ndërmarrë procedurat e nevojshme ligjore, përfshirë edhe masat përkatëse, për të detyruar Bashkinë Kukës të sistemonte financat e saj.
Në këto kushte, Prokuroria e Kukësit ka krijuar dyshime të arsyeshme se disa ish – zyrtarë lokalë kanë konsumuar elementët e veprës penale të “Shpërdorimit të detyrës”.
Ndaj tyre organi i akuzës kërkoi caktimin e masës së sigurisë “arrest në burg”, e cila u pranua nga Gjykata dhe u ekzekutua nga ana e forcave të Policisë së Shtetit. /tvklan.al
