Stuhia tropikale Harvej ka prekur tashmë edhe shtetin federal amerikan të Luizianës. Uragani pritet të godasë edhe Nju Orlinsin, që mban në memorje dëmet e stuhisë shkatrrimtare Katrina të 12 viteve më parë. Deri më tani, autoritetet në Teksas numërojnë 20 të vdekur prej të premtes nga uragani Harvej.
Pasi gjunjëzoi Teksasin, stuhia e fuqishme tropikale Harvej ka prekur Luizianën fqinje. Nju Orlinsi, qyteti më i madh i këtij shteti federal, një pjesë e të cilit ndodhet deri 1 metër nën nivelin e detit, është përgatitur të përballet me një sasi të madhe reshjes që pritet të arrijnë në 25 cm përgjatë 36 orëve në vijim. Pozita e njërit prej qyteteve-porte më të mëdha të Shteteve të Bashkuara, rezultoi fatale në vitin 2005 kur u godit nga një tjetër uragan famëkeq si Katrina që i mori jetën mbi 2 mijë personave.
Harvej preku territorin e Shteteve të Bashkuara të premten kur goditi qytetin Teksan të Korpus Kristit. Pas asaj dite, trajektorja preku edhe Hjustonin, qytetin e katërt më të populluar të Shteteve të Bashkaura. Përmbytjet dhe shkatërrimet kanë shkaktuar një bilanc prej 20 të vdekurish, me një tendencë në rritje.
Mes viktimave është edhe oficeri i policisë Steve Perez, i cili ra në krye të detyrës të dielën, pasi u bllokua mes ujit me automjetin e tij në një nënkalim në Hjuston, gjatë operacioneve të shpëtimit. E teksa operacionet e emergjencës vijojnë, autoritetet kanë shpallur gjendjen e shtetrrethimit që nis në mesnatë dhe përfundon në 5 të mëngjesit me orën lokale. Kjo masë ishte e nevojshme pas raportimit të disa rasteve të grabitjeve gjatë natës, në shtëpitë e braktisura nga banorët, të shndërruara në të pabanueshme si pasojë e përmbytjeve.
Kjo situatë është një test i rëndësishëm për presidentin amerikan Tramp, tragjedia e parë natyrore. Gjatë vizitës së tij në Korpus Kristi, Tramp u shpreh se të gjithë kishin punuar si në skuadër dhe lavdëroi guvernatorin e Teksasit, republikanin Greg Abot për mënyrën se si u përball me situatën.
