Ambasada e Shteteve të Bashkuara të Amerikës ka reaguar pas miratimit të hartës së re gjyqësore nga Këshilli i Ministrave.
Në një reagim në rrjetin social “Facebook”, ambasada bën me dije se mirëpret vendimin për miratimin e hartës së re gjyqësore.
Ambasada thotë se për hartën e re gjyqësore ka pasur edhe ndihmë teknike nga SHBA dhe BE.
“Mirëpresim miratimin nga Këshilli i Ministrave të hartës së re gjyqësore sot. Harta e gjykatave të Shqipërisë u hartua nga Këshilli i Lartë Gjyqësor nëpërmjet një procesi që përfshiu Ministrinë e Drejtësisë dhe aktorë të tjerë, si dhe ndihmë teknike nga qeveria e Shteteve të Bashkuara, Bashkimi Europian dhe Këshilli i Europës. Marrëveshja për hartën, e cila pasoi konsultime të gjera dhe marrjen në shqyrtim të shqetësimeve nga palët e interesuara si pjesë e procesit tre-vjeçar, përfaqëson një shembull të mirë të bashkëpunimit ndërmjet institucioneve të pavarura. Këshilli i Lartë Gjyqësor ka përmbushur me sukses detyrimin e tij ligjor për të garantuar rregullisht që sistemi i gjykatave është gati për të siguruar performancë te efektshme gjyqësore dhe për t’i dhënë drejtësi pa vonesë qytetarëve shqiptarë”,-thuhet në reagimin e ambasadës./Opinion.al
