TIRANE- Lëvizja e deputetëve nga një parti në një tjetër në sesionin e shkuar parlamentar u shoqërua me shkrirjen e dy grupeve parlamentare, konkretisht të Partisë Republikane dhe të Partisë Drejtësi, Integrim dhe Unitet.
Me nisjen e sesionit të ri kuvendor dhe ndryshimin e aleancave, këto dy parti do të jenë sërish në tryezën e partive parlamentare të përfaqësuara me siglën e tyre, edhe pse përmbajtja e deputetëve që kanë fituar në zgjedhjet e 2013 s “çalon”.
Partia e Shpëtim Idrizit dhe ajo e Fatmir Mediut kanë marrë deputetë “borxh” nga partitë kryesore, PSLSI dhe PD, për të mundësuar numrin e 7 deputetëve që nevojiten në Parlament për të formuar një grup parlamentar.
PDIU Partia Drejtësi, Integrim dhe Unitet, e cila në muajt e fundit të viti 2015 iu bashkua koalicionit qeverisës, ka në përbërjen e saj 4 deputetë. Por në sesionin e 9të kuvendor, ajo ka marrë “borxh” tre deputetë, çka i mundëson formimin e Grupit Parlamentar që do të drejtohet nga Shpëtim Idrizi dhe zv.kryetar Tahir Muhedini.
Partia Socialiste ka hequr nga lista e deputetëve të saj Anduel Xhindin, djalin e ishdeputetit Fatmir Xhindi, duke ia dhënë “hua” Grupit Parlamentar të PDIUsë. Më bujare është treguar Lëvizja Socialiste për Integrim, e cila i ka dhënë Shpëtim Idrizit dy deputetë, konkretisht Gledion Rehovicën, i zgjedhur në Berat dhe deputetin e Krujës, Bujar Derveni.
Me prurjet e reja, Partia Drejtësi, Integrim dhe Unitet plotësoi vendin e lënë nga deputeti i Vlorës, Dashamir Tahiri, i cili merr pjesë në mbledhjet e Grupit Parlamentar të Partisë Demokratike, por zyrtarisht figuron në listën e deputetëve të pavarur. Në përbërjen e PDIUsë janë dhe dy deputetët, Omer Mamo i Fierit dhe Aqif Rakipi i Peqinit.
Partia Republikane ka Grupin Parlamentar më interesant, pasi ka vetëm dy deputetë të zgjedhur nga sigla e PRsë dhe 5 deputetë që i ka marrë “borxh” nga Partia Demokratike. Grupi i PRsë do të drejtohet nga Fatmir Mediu dhe zëvendëskryetar i Grupit do të jetë Agron Duka.
Ndërkohë që në këtë grup janë shtuar deputetët e Partisë Demokratike, Bedri Hoxha i Dibrës, Mhill Fufi i Lezhës, Astrit Velaij i Beratit, Florion Mima i Tiranës, po ashtu dhe Gjovalin Bzhetaj i Shkodrës. Në sesionin e shkuar, partia e Fatmir Mediut pësoi një tkurrje të numrave të deputetëve për shkak të “emigrimit” të dy deputetëve të zgjedhur nga partia e tij, të cilët shkuan te Lëvizja Socialiste për Integrim.
Nga PR u largua i pari Luan Duzha i zgjedhur në Elbasan, dhe në vjeshtën e 2015 s, nga radhët e republikanëve u largua edhe deputeti Ylli Shehu.
Në faqen zyrtare të Parlamentit është publikuar edhe lista prej 8 deputetësh, të cilët kanë qëndruar jashtë grupeve parlamentare.
Mesila Doda, e larguar nga Grupi i PDsë, është në listën e deputetëve pa grup, po ashtu Tom Doshi, Nard Ndoka, Vangjel Dule, Dashamir Tahiri. Mirela Ferracaku që mori mandatin e Mark Frrokut është lënë jashtë grupeve parlamentare. Po ashtu edhe deputetët e PDsë, Mimoza Hajdarmataj dhe Alban Zeneli./panorama/
