Për vite më radhë saga e filmave “Harry Potter” dhe personazhet e tij kanë mbajtur mbërthyer shikuesit dhe publikun në mbarë botën.
Kureshtja për personazhet që interpretuan në këto filma vijon të jetë mjaft e fortë edhe në ditët e sotme nga fansat. Protagonisti i këtij filmi, aktori Daniel Radcliffe në një intervistë të dhënë për ‘People’ është shprehur për mënyrën sesi u njoh dhe u dashurua me partneren e tij Erin Darke.
Çifti ka aktruar së bashku në prodhimin kinematografik të vitit 2013 “Kill your Darlings”, pikërisht vendi ku dhe u njohën. Por Radcliffe ka theksuar që skena e parë që duhet të interpretonin ka qenë e sikletshme dhe jo njohja tipike për t’u treguar nipërve kur të bëhen gjyshër.
Në këtë skenë personazhi i Darke ka qenë duke i bërë seks oral personazhit të Radcliffe në një bibliotekë. Sipas aktorit kjo ka qenë hera e parë që ata kanë patur kontakt me njëri-tjetrin.
“Personazhet tanë janë takuar dhe kanë flirtuar me njëri-tjetrin kështu që është një kujtim i ëmbël për ne,”-ka përfunduar aktori i njohur britanik.
Gjatë kësaj interviste për “People” ai ka theksuar gjithashtu se nuk do të lodhet asnjëherë të flasë për eksperiencën e tij në Harry Potter për fansat e tij.
“Kur isha më i vogël kam takuar një këngëtar të rrymës punk të një grupi që më pëlqente shumë. Kështu që shkova e pyeta për eksperiencën e tij në këtë grup dhe më tha që nuk fliste më për këtë temë. Të them të drejtën u mërzita. Mendoj se do të ishte e trishtë mos flisja për këtë periudhë të gjatë të jetës time. Edhe pse jam i lumtur tani që po bëj filma të tjerë do të jem gjithnjë i nderuar kur dikush të më thotë: Ti ishe një pjesë e madhe e fëmijërisë time,”-përfundon Radcliffe./Xh.K/Opinion.al/
