Ish-kryeministri i Kosovës, Ramush Haradinaj ka pranuar se presioni i vendeve të QUINT-it ka detyruar qeverinë të japë dorëheqjen. Në një intervistë, Haradinaj shprehet se i respekton këto vende por ka theksuar se me presion nuk do të bindet.
“Vendet e QUINT-it, janë të respektuara, dhe janë aleatë të Kosovës dhe janë të interesuara për marrëdhënie të mira me Serbinë. Por ata duhet ta kuptojnë se nuk ka hapësirë më, as për t’i bërë presion Kosovës, sepse me këtë presion e detyruan Qeverinë të japë dorëheqje, me masa të çuditshme, e çka tjetër. Nëse duan destabilizimin e Kosovës, ose kthimin e krizave në Ballkan, edhe mund ta bëjnë. Por ashtu nuk fiton askush, as Kosova, as rajoni, e as Bashkësia Ndërkombëtare. Ata kanë mbërri në atë fundin, nëse duan mund të na mbysin, por me presion më nuk mund të na bindin. QUINT-i duhet ta kthejë presionin ndaj Serbisë, e cila në mënyrë joparimore ka vënë kusht vetëm për të filluar dialogu po thotë hiqe taksën. E çka do të kërkojë atëherë për njohje, nëse vetëm për të filluar dialogu e kërkon tregun”, deklaroi Haradinaj.
QUINT është një grup informal vendimmarrës brenda NATO i cili përbëhet nga SHBA, Franca, Gjermania, Italia dhe Mbretëria e Bashkuar.
Haradinaj nënvizoi gjithashtu se nuk do të pranojë më asnjë kërkesë për heqjen e taksës ndaj Serbisë si kusht për nisjen e dialogut me Serbinë.
“Unë nuk jam për t’i përfillur këto kërkesa të QUINT-it. Jam për t’iu thënë na falni, ne jemi vend sovran, ne kemi versionin tonë si mund të merremi vesh me Serbinë, nëse e respektoni vijmë në tavolinë, nëse jo po presim. Nuk është me çdo kusht dialogu. Unë e di çka kam heq me ndal ndarjen e Kosovës”, deklaroi Haradinaj. /Opinion.al
