Kryeministri në detyrë i Kosovës, Ramush Haradinaj duket se e ka lënë derën e hapur për një negociatë të partisë që ai drejton për formimin e qeverisë së re. Në një konferencë për mediat, Haradinaj u pyet se cila nga dy partitë, LDK apo Vetëvendosje duhet të “lëshojë pe” për një marrëveshje për koalicionin.
“Nuk mundet i dyti të krijojë qeveri. Vetëm i pari, s’ka lidhje se kush është i pari, cilido qoftë. Kushtetuta është shumë e qartë, procesi politik është shumë i qartë.”
Sa i përket mundësisë që AAK-ja të bëhet pjesë e ndonjë negociate për krijim të qeverisë së re, ai deklaroi se nuk kanë marrë ftesë për t’u takuar nga dikush prej Lëvizjes Vetëvendosje.
“Sa i përket LDK dhe LVV-së të them të drejtën nuk na ka kontaktuar kërkush prej Vetëvendosjes në radhë të parë, nuk e dimë çka është duke ndodhur saktësisht, s’kemi qenë palë nuk e dimë procesin, e kam thënë disa herë se në sistemin tonë parlamentar, partia e parë e ka përgjegjësinë për të krijuar institucione”, ka deklaruar Haradinaj.
Kryeministri në detyrë dhe kreu i AAK-së, thotë se partia në të cilën ai udhëheq nuk është pjesë e ndonjë negociate./ Opinion.al
