Kryeministri në detyrë i Kosovës, Ramush Haradinaj ka deklaruar se Albin Kurti duhet të gjejë formulën e krijimit të një shumice qeverisëse ose “të hapë rrugën”.
Në një intervistë, Haradinaj është shprehur se i duhet dhënë fund epilogut të formimit të qeverisë së re dhe se kjo gjendje është e rrezikshme për Kosovën.
“Unë pres nga z. Kurti që t’i thërret ndërgjegjes së vet. Ose ta gjej formulën me bë shumicën, në këtë rast me LDK-në, sepse unë s’jam palë e negociatave, ose të hapë rrugë. Të deklaron çka i propozon Kosovës fituesi i zgjedhjeve në këtë rast. Le të deklaron për çka është. A është për një qeveri teknike, a është për një qeveri tjetër, a është për të shkuar në zgjedhje. Por diçka duhet t’i thotë Kosovës nuk mund ta mbajë varur”, deklaroi Haradinaj.
Ai ka komentuar gjithashtu mos arritjen e një marrëveshjeje mes VV-së dhe LDK-së duke nënvizuar se përgjegjësia këtu bie mbi kreun e VV-së, Kurti, sepse sistemi ngarkon fituesin me detyrën e krijimit të qeverisë.
“Nuk është përgjegjësia te partia e dytë, por në sistem tonin përgjegjësinë me krijua institucione e ka vetëm Albin Kurti dhe VV-ja. Por nuk mundesh ti sot me ju thënë partive. Nuk është duke formuar qeveri LDK-ja, ajo i bashkohet një qeverie. Përgjegjësia bie mbi z. Kurtin, ai duhet të dijë t’i akomodon të gjithë ata me të cilët do me bë shumicën parlamentare”, shtoi ai. /Opinion.al
