Kryeministri në dorëheqje i Kosovës, Ramush Haradinaj ka dorëzuar në Gjykatën Kushtetuese, kërkesën për interpretim të dorëheqjes së tij nga posti, duke kërkuar nga gjykate edhe përcaktimin e kompetencave dhe funksionimit të qeverisë pas veprimit të tij.
“Qëllimi i kërkesës është, që jo vetëm të kërkohet sqarim për situatën juridike të krijuar pas dorëheqjes sime, dhe me këtë, të shmanget vakuumi institucional, por edhe që ky interpretim nga Gjykata Kushtetuese t’i qartësojë situatat e ngjashme në të ardhmen”, ka thënë ai në një postim në rrjetin social, Facebook.
Haradinaj ka thënë gjithashtu se do ta respektojë çdo vendim të gjykatës, teksa i ka bërë thirrje presidentit të Kosovës, Hashim Thaçi, Parlamentit të Kosovës dhe partive politike që të ndërmarrin veprimet e duhura për shpalljen e zgjedhjeve parlamentare.
“Shpresoj se për shkak të urgjencës Gjykata do të vendosë shpejt. Cilido të jetë ai vendim unë do ta respektoj. Në të njëjtën kohë, i bëjë thirrje Presidentit të Republikës së Kosovës, Parlamentit dhe partive politike që të ndërmarrin veprimet e duhura për shpalljen e zgjedhjeve parlamentare”, shkruan Haradinaj.
Kujtojmë se Haradinaj ka dhënë dorëheqje nga posti i kryeministrit më 19 korrik, pasi u ftua nga Prokuroria Speciale në Hagë për t’u intervistuar në cilësinë e të dyshuarit për krime lufte./Opinion.al
