Kryeministri i Kosovës, Ramush Haradinaj, është shprehur se pas ratifikimit të Demarkacionit me Malin e Zi, liberalizimi i vizave për Kosovën në “Shengen” do të ndodhë brenda 9 muajsh.
“Liberalizimi ka ndodhur pardje… pjesa e mbetur e punëve do të përfundojë, por ka ndodhur pardje. Më vjen keq që shkoi ashtu siç shkoi, por liberalizimi ka ndodhur, e dini pse po e them këtë. Është një proces para së gjithash në rend dhe ligj, si dhe një luftë e hapur ndaj krimit dhe korrupsionit. Është proces pune, por liberalizimi ka ndodhur pardje”, tha ai.
Sipas Haradinajt, është qytetari i Kosovës ai që ka dalë fitues nga vota e së mërkurës në Kuvend, ku u ratifikua marrëveshja për demarkacionin.
“Liberalizimin e ka fituar qytetari i Kosovës, janë disa aspekte që duhet me i përfunduar ne, ku më pas të vazhdojmë me i furnizu institucionet e BE-së, ministrat veç e veç. Koha minimale që mund të marrë Kosova për të lëvizë lirshëm është 3 muaj, por s’është aq reale, koha reale është 6 muaj, por edhe mund të shkojë maksimumi 9 muaj. Por liberalizimi ka ndodhur tani, është zbatimi, implementimi që duhet ta kryejmë së bashku”, shtoi ai.
