“Të turpshme” e ka quajtur kreu i AAK-së, Ramush Haradinaj ndarjen eventuale të Fatmir Limajt me dy deputetët e tij per t’iu bashkuar Vetëvendosjes. Sipas tij, të dyja partitë kishin kërkuar votën qytetare për ndryshim, ndërsa sjellja e Nismës pas zgjedhjeve ka shkuar në drejtim të kundërt.
Ai tha se mungesa e komunikimit me kreun e Nismës, Fatmir Limaj dhe pozicionimi i hershëm i kësaj partie, e kanë vështirësuar mundësinë për krijimin e shumicës nga opozita.
“Nëse ai do të ndahet është i lirë. Por ne do vazhdojmë”, tha Haradinaj.
Derisa të martën mbahet seanca konstituive e Kuvendit, Haradinaj tha se në parim do ta votojnë kryetarin e Kuvendit të Kosovës nëse propozohet nga partia e Kurtit.
Por vota për kryeparlamentar nuk ka Partia Demokratike, përderisa sipas tyre nuk ka një zgjidhje të qëndrueshme për vendin.
“Nuk do marrim pjesë në votim deri sa nuk kemi një zgjedhje të qëndrueshme për Kosovën”, tha Lushtaku.
Gjatë ditës janë regjistruar deputetët e partive të vogla si dhe komuniteteve përfshirë edhe ata të listës serbe. Vetëvendosje, që ka dal partia e parë nga zgjedhjet ka të drejtën që të propozojë kryeparlamentarin. Seanca konstituive, konsiderohet e përmbyllur vetëm pas betimit të deputetëve si dhe pasi të jenë zgjedhur kryetari dhe nënkryetarët.
