Një 39-vjeçar është arrestuar pasi me të dhëna të personave të tjerë hapte llogari false në rrjetet sociale.
Policia e Shtetit bën me dije se në kuadër të operacionit policor të koduar “Username” u ndalua, për veprën penale “Falsifikimi kompjuterik”, E. M., 39 vjeç, banues në Tiranë, i dënuar më parë për veprën penale “Vjedhja me dhunë”.
Ka qenë shtetasja me inicialet A. V., ajo që ka kallëzuar në polici se një shtetas hapte llogari në rrjetet sociale me të dhënat dhe fotot e saj personale, në mënyrë të vazhdueshme.
Pas verifikimeve të kryera nga specialistët e Krimit Kompjuterik ka rezultuar se 39-vjeçari ka hapur në mënyrë të vazhdueshme, llogari false në rrjetet sociale, me gjeneralitetet dhe fotot e personave të tjerë.
Materialet procedurale për këtë rast i kaluan Prokurorisë, për veprime të mëtejshme.
Aktualisht janë duke u hetuar të gjitha rastet e denoncimeve nga qytetarët, për keqpërdorimin e të dhënave personale për hapjen e llogarive false në rrjetet sociale dhe çdo rast tjetër të falsifikimit kompjuterik, vepër penale për të cilën Kodi Penal parashikon dënimin me burgim nga gjashtë muaj deri në gjashtë vjet./Opinion.al
