Gjatë një deklarate përpara mjekëve të spitalit COVID 1, kryeministri Rama foli edhe për vendimin e qeverisë për hapjen e shkollave duke u shprehur i shqetësuar edhe si prind i një fëmije që këtë vit do të hyjë në klasën e parë.
“Kemi marrë vendimin për hapjen e shkollave, dihet fëmijët janë më pak të rrezikuar, por nuk janë imunë, janë transmetues, kështu që … Kemi edhe çunin që do shkojë në klasë të parë, me maskë, ti themi mos tako, mos u përqafo, rri larg, vendoset në një situatë që psikologjikisht është komplet e panjohur nga pikëpamja e pasojave që lë në aspektin e zakoneve që krijon, se ne si prindër themi takoje, përqafoje, ndërkohë që duhet ti themi të kundërtat, sfidë e jashtëzakonshme por ajo që vlen të thuhet është se ne na ka zgjedhur, nuk e kemi zgjedhur”- tha ai.
Kryeministri Edi Rama u shpreh gjithashtu se qeveria ka bërë një rezervim për vaksinën anti-COVID kur të dalë.
“Kemi bërë një rezervim për vaksinën kur të dalë, do të shohim si proces kur të dalë. Edhe për strukturat jemi përgatitur për ta zgjedhur kapacitetin pritës” tha ai. /Opinion.al
