29 nëntori i 2021 nuk shënoi vetëm 77-vjetorin e Çlirimit të Shqipërisë, por dhe hapjen e rrugës së Arbrit. Mëngjesin e sotëm, kryeministri Edi Rama postoi një video në “Facebook” ku shfaqej rruga e cila dukej gati për qarkullimin e automjeteve.
Por, nga ana tjetër Partia Demokratike e ka cilësuar hapjen e kësaj rruge sot, propagandë. Deputetja demokrate thotë se rruga ende nuk ka përfunduar dhe se qeveria po tallet me dibranët.
Deputetja thotë se rruga që na ka kushtuar 400 miliardë lekë është e papërfunduar, teka i drejtohet qeverisë me një pyetje “a do të paguajnë ata deri në 8 euro për një udhëtim vajtje-ardhje në Rrugën e Arbrit, kur rruga të përfundojë sipas kontratës?!”
Postimi i deputetes
Nxitimi për të shpallur, në ditën e ndarjes së shqiptarëve, hapjen e Rrugës së Arbrit, kur rruga akoma nuk ka mbaruar sipas kontratës, është, më e pakta, tallje me dibranët. Dështimi i qeverisë për të mbajtur premtimin e përfundimit të rrugës në prill dhe dështimi i premtimit për ta përfunduar rrugën në fund të këtij viti nuk mund të mbulohet nga propaganda e qeverisë.
E vërteta është se rruga që na ka kushtuar 400 miliardë lekë është e papërfunduar dhe hapja e sotme është propagandistike.
Në vend të mashtrimeve, qeveria duhet t’u thotë dibranëvë dhe shqiptarëve a do të paguajnë ata deri në 8 euro për një udhëtim vajtje-ardhje në Rrugën e Arbrit, kur rruga të përfundojë sipas kontratës?!/ Opinion.al
