Komisioni për Sigurinë Kombëtare ka miratuar sot projektligjin për një qendër të përbashkët policore dhe doganore me Greqinë.
Edhe Partia Demokratike ka qenë pro. Deputeti i PD-së Ervin Salianji u shpreh se opozita është pro, për çdo marrëvedhje ndërkombëtare.
“Padiskutim që jemi pro, siç jemi për çdo marrëveshje ndërkombëtare. Duket qartazi që është kërkuar nga pala greke”- tha Salianji.
I pranishëm në komision, ka qenë edhe zv.ministri i Brendshëm Andi Mahila, i cili ka dhënë detaje lidhur me marrëveshjen.
“Funksionimi i kësaj qendre nuk do sjellë mbivendojse me organet doganore policore pasi qëllimi është rritja dhe forcimi i bashkëpunimit ndërmjet shkëmbimit të informacionit. Kjo është qendër e përbashkët e shkëmbimit dhe analizimit të informacionit. Kjo qendër trajton të gjithë çështjet dhe elementët që janë të ngjashme për të gjitha kalimit kufitar. Nuk është qendër e kalimit të përbashkët të mjeteve e mallrave. Shkëmbim informacioni për çështje të përbashkëta”.- tha Mahila.
Më tej ai është shprehur se kjo qendër do jetë e përbërë nga 2 grupe, njëra nga pala shqiptare dhe tjetra greke, secila me 5 zyrtarë.
“Nuk ka mbivendosje për çështjet operative, ekzekutive. Zyrtarët e qendrës s’kanë kompetencë dhe s’marrin pjesë në veprime operative që i përkasin policisë apo pjesës së drejtorisë së përgjithshme të doganave. Kjo qendër është përcaktuar të ketë në mënyrë të barabartë 5 zyrtarë nga secila palë. Nga pala jonë është përcaktuar një punonjës policie me gradën nën komisar dhe 4 punonjës policie me gradën inspektor. Angazhimi i tyre është vetëm për grumbullimin dhe shkëmbimin e informacionit”.- tha zv.ministri./Opinion.al
