Punimet për aksin e Unazës së Madhe të Tiranës nga Pallati me Shigjeta deri tek Shqiponja pritet të nisin në fund të këtij viti. Autoriteti Rrugor Shqiptar ka hapur garën për tenderin me vlerë 50 milionë dollarë. Rruga do të jetë autostradë e ngjashme me rrugën e TEG-ut, dhe sipas ARRSH-së do të realizohet sipas standardeve dhe cilësisë që është përdorur edhe në pjesët e tjera të unazës.
Pjesët anësore të rrugës do të mbyllen për tu bërë të pakalueshme nga banorët e zonës, ndërsa për ta do të ketë mbikalime të dedikuara, në mënyrë që të evitohen aksidentet.
Ky është segmenti i parafundit i Unazës së Madhe. Pas tij mbetet për tu plotësuar rruga nga sheshi “Shqiponja” për tek Bulevardi i Ri, por për të autoritetet po punojnë për të përgatitur projektin, ndërsa fondet do të alokohen me buxhetin e vitit të ardhshëm. Në muajin gusht ARRSH hapi tenderin për lotin që lidh zonën e Shkozës me Ali Demin dhe Kodrën e Prifitit dhe segementin mes Saukut, Farkës dhe që del më pas në Shkozë. Me ndërtimin e këtyre dy akseve plotësohet e gjithë Unaza e Madhe e kryeqytetit.
*Në foto: Projekti per mbikalimin tek “Shqiponja”
