Hamasi liroi pasditen e së premtes 24 nga pengjet e marra në Izrael. Në këmbim, pritet tashmë që të lirohen 39 të burgosur palestinezë nga burgjet izraelite.
Të arrestuarit akuzohen për një sërë veprash, nga gjuajtja me gurë deri te tentativa për vrasje. Marrëveshja, e ndërmjetësuar nga Katari, përfshin një pauzë katër-ditore në luftime.
Autobusët e Kryqit të Kuq raportohet se kanë mbërritur në burgun Ofer në Bregun e pushtuar Perëndimor, gati për të liruar 24 gra dhe 15 djem adoleshentë të moshës nën 18 vjeç.
Ata do të transferohen në një pikë kontrolli ushtarake e Izraelit në Bregun Perëndimor dhe më pas do të lejohen të kthehen në shtëpi, sipas shërbimit të burgut të Izraelit.
Të arrestuarit u zgjodhën nga një listë prej 300 grash dhe të miturish, të përpiluar nga Izraeli.
Më pak se një e katërta e atyre në listë janë dënuar, shumica dërrmuese po mbahen në paraburgim në pritje të gjykimit. Pjesa më e madhe e të zgjedhurve janë djem adoleshentë, 40% e tyre nën moshën 18 vjeç. Mes tyre është gjithashtu një vajzë adoleshente dhe 32 gra.
