Analisti Halil Matoshi me anë të një shkrimi në gazetën ‘Koha’ ka theksuar se nacionalizmi shqiptar që nga Lidhja e Prizrenit e deri te Pavarësia e Shqipërisë më 1912 dhe të gjitha përpjekjet e shqiptarëve etnikë për liri nën tri Jugosllavitë, sot duhet transformuar në kosovarizëm-patriotizëm etatist- sepse kjo domethënë të marrësh përgjegjësi për vetveten.
Matoshi shkruan se është koha kur të gjithë, pra edhe Shqiptarët e “Shqipërisë së Poshtme”, duhen të vihen në shërbim të etablimit të shtetit kosovar si entitet juridik-politik dhe afirmimit ndërkombëtar të tij, sepse shteti sovran i Kosovës duhet të vlejë si tregimi më i suksesshëm i këtij nacionalizmi, e jo shqiptarët e Republikës së Shqipërisë t’i çojnë hundët pse Kombëtarja kosovare ka joshur dy-tre futbollistë me origjinë kosovare që më parë kanë luajtur futboll për Kombëtaren.
“Nëse Kosova është tashmë “Njësi e rritur”, ka territorin nën administrim efektiv, popullsinë e përhershme dhe një qeveri të zgjedhur – entitet juridik-politik sipas Kartës së Monte Videos – komb i aftë për të hyrë në marrëdhënie me kombet tjera si subjekt i së drejtës ndërkombëtare e me synimin që të marrë karrigen në Organizatën e Kombeve të Bashkuara (OKB), atëherë si çdo shtet-komb, ndër tjera duhet të ketë edhe një kombëtare në futboll”, shkruan Matoshi.
Ai nënvizon me të madhe se të shkruash se Kosova shtet sovran nuk ka të drejtë të ketë kombëtare futbolli, porse vetëm përfaqësuese, është injorancë e thellë, për më tepër mohim i qenësisë se saj dhe fyerje, sepse perfaqësuese në sporte kanë edhe entitetet që nuk janë shtete si Katalonja etj.
“Përse Kosova e ka një Teatër Kombëtar, një ansambël kombëtar të këngëve dhe valleve “Shota”, një Bibliotekë Kombëtare, por nuk mundka të ketë një kombëtare futbolli?
Përse zërat etnonacionalistë po rriten në elemente shpërbërëse të shoqërisë dhe shtetit kosovar?”, shkruan Matoshi.
