Shërbimi i Çështjeve të Brendshme dhe Ankesave pranë Ministrisë së Brendshme nis hetimet për policët që filmuan dhe shpërndanë videon e ministrit teknik Dritan Demiraj, i cili pengoi sekuestrimin e disa provave materiale për helmimin në mitingun e PD-së.
ABC News ka mësuar se hetimet kanë nisur nga SHÇBA-ja, e cila është vënë në kërkim të punonjësit të policisë që regjistroi me kamerën e trupit ministrin Demiraj dhe më pas e shpërndau atë në media.
Për llogari të këtij hetimi, mësohet se efektivët e SHÇBA-së së Ministrisë kanë kërkuar disa materiale në prokurori, ku po hetohet rasti i helmimit të 150 pjesëmarrësve në aktivitetin e opozitës pranë kryeministrisë.
Janë sekuestruar të gjitha raportet e shërbimit të efektivëve të policisë që ndodheshin në vendin e ngjarjes, pranë magazinës së kompanisë private në Kashar, ku oficerët e policisë gjyqësore po kërkonin sekuestrimin e 12 prozhektorëve ndriçues.
Këto materiale shkresore, thonë burimet, do të nxjerrin në pah se kush nga punonjësit e policisë ka bërë filmimin ku shfaqet ministri teknik duke kërkuar mos sekeustrimin e të gjithë prozhektorëve.
Nga ana tjetër, veç hetimit për filmimin dhe shpërndarjen e videos në media, mësohet se SHÇBA-ka na nis hetimet edhe për oficerin e policisë gjyqësore, i cili në komunikimin me ministrin Demiraj ka pretednuar se po kryente sekuestrimin me urdhër të prokurorisë.
Burimet thonë se oficeri nuk kishte urdhër nga prokurori për kryerjen e sekuestrimit të prozhektorëve, ç’ka sipas SHÇBA-së ai ka gënjyer Ministrin ndaj po hetohet për akuzën e “shpërdorimit të detyrës”.
Sa i përket hetimeve për shkakun e helmimit të 150 pjesëmarrësve në aktivitetin elektoral të PD-së ato për momentin kanë ngecur, pasi Forcat e Armatosura nuk kanë kthyer përgjigje për rezultatin e analizave.
Ndërsa Mjekësia Ligjore, është shprehur se nuk ka kapacitetet teknologjike e njerëzore për të kryer analiza të thelluar, se cili ishte shkaku që rreth 15 persona kërkuan ndihmë mjekësore pas mitingut.
