Mali i Zi të mërkurën pezulloi mësimet në 41 shkolla në të gjithë vendin për shkak të një alarmi për bombë.
Ministria e Arsimit, Shkencës, Kulturës dhe Sportit tha se mësimi është pezulluar në kryeqytetin Podgoricë dhe disa qytete duke përfshirë Barin, Kotorrin, Herceg Novi, Nikshiq, Berane, Danilovgrad, Kolasin, Bijelo Polje, Plavë, Gusinje, Sutomore, Petrovac dhe një kopësht fëmijësh në qytetin e Mojkovcit.
Policia tha se po merrte masa sigurie në shkolla ndërsa po vijonin verifikimet. “Drejtoria e shkollave dhe stafi pedagogjik po bashkëpunojnë me policinë dhe kanë informuar prindërit. Ata duhet të vazhdojnë të komunikojnë me administratën e shkollave për të rifilluar mësimet pas përfundimit të aktiviteteve policore”, thuhet në njoftimin e policisë.
Mediat raportuan se shkollat në të gjithë vendin morën email kërcënues nga një person i panjohur, ku thuhej se “shumë bomba janë vendosur në mjediset e shkollave”.
“Ne gjithmonë kemi ëndërruar për hakmarrje. Ne do të marrim hak. Ne do të vijmë në shkollë. Ne do të vrasim këdo. Askush nuk do të mbetet gjallë. I gjithë qyteti do të rrjedhë gjak”, shkruhej në emailet.
Në Nikshiq dhe Bar, ndërtesat komunale u evakuuan dhe u rrethuan nga policia. Policia ka evakuuar edhe godinën e gjykatës në Tivar.
Kryetari i komunës së Nikshiqit Marko Kovaçeviç u bëri thirrje qytetarëve që të mos përhapin panik. “Është e tmerrshme që dikush po kërcënon jetët e njerëzve në këtë mënyrë”, ka postuar ai në Facebook.
