Kryeprokurorja e përgjithshme e përkohshme ka vepruar me dorë të hekurt, duke filluar hetim procedural për 10 prokurorë të krimeve të rënda, si dhe duke transferuar në rrethe 3 prej tyre. Konkretisht Besim Hajdarmataj, prokuror i çështjes “Tahiri”, është transferuar me urdhër të Arta Markut në Pogradec.
Sonila Muhametaj, nga krimet e rënda shkon në Pukë. Olsjan Çela nga krimet e rënda shkon në Berat. Në një njoftim për media, zyra e shtypit e Arta Markut bën të ditur se transferimi i tyre është i përkohshëm. Kjo masë vjen pas një sherri që ka ndodhur dje në krimet e rënda ku prokurorët në fjalë nuk i janë bindur drejtueses së këtij institucioni Donika Prela, për të marrë pjesë në shortin për dosjen Shullazi.
Kjo çështje mbetet në udhëkryq pasi Arta Marku ende nuk ka vendosur se kush do ta lexojë pretencën për Shullazin, teksa komunikon vetëm “reprezaljet” për prokurorët që nuk pranuan shortin.
Njoftim nga Prokuroria e Pergjithshme:
Prokurori i Pergjithshem urdheroi caktimin e perkohshem te prokuroreve:
Olsian Çela nga Prok.per Krime te Renda ne Prok.Berat.
Sonila Muhametaj nga Prok.per Krime te Renda ne Prok.Puke.
Besim Hajdarmataj nga Prok.per Krime te Renda ne Prok.Pogradec.
