Deputetja e Kuvendit të Shqipërisë Rudina Hajdari përmes një postimi në Twitter, e ka cilësuar vendimin e opozitës për të mos marrë pjesë në zgjedhje si fatalitet politik.
Hajdari shkruan në reagimin e saj se kjo gjendje ka ardhur si rrjedhojë e urisë absolute të qeverisë për të gllabëruar çdo gjë. Deputetja demokrate ka theksuar se palët duhen të ulen në bisedime për të zgjidhur krizën politike.
“Sa nuk është vonë të gjithë ata që duan të ardhmen e Shqipërisë, nuk duhet të qëndrojnë indiferentë, por të ulen në tryezën e bisedimit për të gjetur zgjidhjen e shumë pritur.Nga ana tjetër, indiferencën e qeverisë për situatën e krijuar dhe uria absolute e saj për të gllabëruar çdo ditë pushtet, nuk përbën gjë tjetër, veçse shkakun e drejtë për drejtë të kësaj gjëndjeje. Marrëveshja ndërmjet partive politike të opozitës për mospjesëmarrje në zgjedhjet lokale, e shikoj si një fatalitet politik”.
Të enjten në orën 18.00 opozita përshkallëzon protestën për zgjedhjet. Për rreth një orë ajo do të bllokojë 5 akse kombëtare. Në Elbasan, qarkullimi në rrethrrotullimin Bradashesh do të paralizohet, ndërsa në Durrës do të bllokohet autostrada Plepa-Kavajë. Edhe autostrada e Milotit për rreth një orë do të bllokohet nga militantët e opozitës. Në të njëjtën orë kalimi në rrethrrotullimin e Sheqit në Fier dhe atë të Shqiponjës në Tiranë gjithashtu do të paralizohet.
Përmes kësaj forme të mosbindjes civile te përdorur edhe më parë, opozita synon të forcojë mesazhin se aksioni i saj do të përshkallëzohet nëse kushti i saj për qeveri tranzitore dhe zgjedhje pa Edi Ramën kryeministër nuk plotësohet. Bllokimi i rrugëve do i paraprijë protesta simbolike e të rinjve të FRPD-së e cila rikthehet tek Parlamenti në të njëjtën orë me seancën plenare./ Opinion.al E.Xh
