Zëdhënësi i grupit parlamentar CDU/CSU në Bundestag për politikat evropiane, Florian Hahn ka treguar reagimet që kanë ardhur nga Partia Demokratike, pasi ky i fundit kritikoi lënien e mandateve. Në një intervistë për DW, ai ka thënë se ka marrë disa reagime, “por jo direkt nga partia jonë partnere (PD).
Këshilla e tij për krizën është që njerëzit të cilët ndodhen në listat e PD-së dhe PS-së të pranojnë mandatin. “Kjo është një situatë e vështirë: Zakonisht ka një pasardhës për dikë që lëshon një mandat. Në se ka njerëz të arsyeshëm që janë në gjendje ta bëjnë këtë, atëherë këta duhet të zënë vendet e mbetura bosh”, thotë , Florian Hahn.
Sa i përket zgjedhjeve të parakohshme që kërkon opozita, zyrtari gjerman thotë se ky do të ishte një precedent i rrezikshëm.
“E çfarë do të mësonin partitë nëse do të imponoheshin zgjedhje të reja në një mënyrë që nuk parashikohet nga kushtetuta? Ta zëmë se do të kishim kështu një parti tjetër në pushtet. Çfarë do të mësonte partia opozitare nga kjo? Ajo do të mësonte se duke bojkotuar sistemin dhe duke dorëzuar mandatet sërish mund të imponoheshin zgjedhje të reja. Këtu shtrohet pyetja se ku dëshiron të shkojë Shqipëria. Dëshiron të jetë një vend i qëndrueshëm demokratik, dëshiron të bëhet pjesë e BE-së? Opozita bën mirë që i shoqëron në mënyrë kritike proceset reformuese. Por jo bojkoti, bojkoti nuk është i përshtatshëm për përkrahjen e Shqipërisë në rrugën e saj drejt BE-së”. /G.F Opinion.al
