Maqedonia e Veriut e meriton që në tetor të marrë dritën e gjelbër për nisjen e negociatave për anëtarësim në Bashkimin Evropian, ka thënë në Shkup, komesionari për Zgjerim i BE-së, Johannes Hahn.
Ai theksoi se për të realizuar këtë, është e domosdoshme që vendi të vazhdojë të zbatojë reformat, veçanërisht në fushën e sundimit të ligjit – duke miratuar ligjin mbi prokurorinë publike dhe luftën e pa kompromis kundër korrupsionit dhe krimit.
“Shtetet anëtare do të monitorojnë nga afër procesin, por të gjitha ato që po bëhen janë kryesisht për të mirën e qytetarëve. Sundimi i ligjit është thelbësor që ata të kenë besim në institucionet, por edhe se vendi eshtë i qëndrueshëm, politikisht dhe ekonomikisht”, ka thënë Hahn në një konferencë shtypi pas takimit me kryeministrin maqedonas Zoran Zaev.
“Është koha që BE-ja të përmbushë detyrimet e saj ndaj Maqedonisë së Veriut”, shtoi Hahn.
Ai përmendi marrëveshjen mes Shkupit dhe Athinës për çështjen e emrit si një arritje të madhe për Maqedoninë e Veriut.
Në anën tjetër, kryeministri Zoran Zaev, u shpreh i bindur se në tetor vendi do të marrë datën e nisjes së negociatave për anëtarësim në BE.
Këshilli e Bashkimit Evropian në takimin e qershorit, nuk ka dhënë një datë fikse për nisjen e bisedimeve për anëtarësim me Maqedoninë e Veriut, duke përmendur si arsyetim procesin e zgjedhjeve të Bashkimit Europian dhe publikimin vonë të Raportit të Progresit. /Opinion.al
