Komisioneri për Zgjerimin në BE, Johanes Hahn thotë se Brukseli nuk do të bëjë arbitrin dhe nuk do të ndërhyjë asnjëherë për të zëvendësuar një qeveri, me një tjetër.
“Unë dënoj çdo lloj përdorimi të dhunës. Kjo nuk është ajo që ne mund të pranojmë apo të shohim, por duhet të them, që nuk jemi nga ata që mund të futemi në një vend si një forcë ushtarake e të largojmë një qeveri dhe ta zëvendësojmë atë me një tjetër. Kjo nuk ka te bëjë me botëkuptimin tone të funksionimit të ligjit”, deklaroi Hahn në konferencën përmbyllëse të takimit të 15-të të stabilizim-asocimit BE-Maqedoni e Veriut.
Ai thotë se ndryshimi i qeverive vjen vetëm përmes votës.
“Botëkuptimi ynë për sundimin e ligjit, demokracinë, transparencën e sistemit gjyqësor është që: Po, aty mund, dhe duhet të ketë ndryshime politike, por ama me kusht që të jenë të bazuara në procese demokratike. Në zgjedhje të lira të ndershme dhe transparente. Kjo është ajo që ne përpiqemi të lehtësojmë dhe të mbështesim. Por, të besohet se ne jemi ata që veprojmë si arbitra, se kush është i mirë e kush është i keq, njëri duhet të largohet dhe tjetri duhet të vijë, ky nuk është qëndrimi ynë. Kush beson, se ne veprojmë në këtë mënyrë e ka gabim. Ne do të bëjmë gjithçka për të forcuar demokracinë në rajon”. Edhe shefja e diplomacisë Europiane Federica Mogherini thotë se nuk e shqetësojnë akuzat./ Opinion.al
