Marrja në pyetje e dëshmitares së parë vijon po me dyer të mbyllura në Gjykatën Speciale në Hagë.
Pas prokurorisë, ishte radha e mbrojtjes së ish krerëve të Ushtrisë Çlirimtare të Kosovës për intervistimin e gruas në fjalë, identiteti i së cilës nuk është bërë publik për shkaqe sigurie.
Në sallën e gjyqit janë të pranishëm fizikisht Hashim Thaçi, Kadri Veseli, Jakup Krasniqi dhe Rexhep Selimit, ndaj të cilëve janë ngritur 10 akuza për krime lufte dhe kundër njerëzimit.
Përpara se dëshmitarja të paraqitej në sallë, avokatët mbrojtës të Thaçit paraqitën një provë materiale për të rrëzuar pretendimet ndaj ish presidentit të Kosovës.
Ajo nuk është kundërshtuar nga prokuroria dhe është pranuar nga trupi gjykues. Kjo është dita e dytë që dëshmitarja e prokurorisë po dëgjohet në seancë private, ku gjatë këtyre dy rasteve, fotografia dhe zëri i gruas ishte i mbuluar, gjë e cila ka ngjallur pakënaqësi në Prishtinë.
Për këtë kanë reaguar nga organizatat e dala nga lufta e UÇK-së duke kërkuar më shumë transparencë nga Gjykata Speciale.
Drejtuesi aktual i kësaj organizate, Faton Klinaku,shprehu revoltën e tij në rrjetet sociale.
“Pak po ju duket që i fshihet fytyra dhe zëri dëshmitares, veç edhe kalojnë në seancë edhe më private”, ka shkruar ai./Opinion.al
