“Nëse në zgjedhjet e ardhshme do të shkohet pa votën e diasporës, ato do të jenë antikushtetuese”, kështu është shprehur Florian Haçkaj, përfaqësuesi i lëvizjes “Diaspora e Lirë”.
Përmes një lidhje direkte për emisionin “Opinion” në Tv Klan, Haçka është shprehur se vota e emigrantëve shqiptarë nuk është çështe politike, por kushtetuese.
“Nuk është çështja a jam pro apo kundër, kjo është çështje jo politike, por ligjore, kushtetuese. Kur flet Gjykata Kushtetuese, në çdo shtet të së drejtës merret dhe zbatohet, sot jemi në tejkalim të këtij afati dhe nëse në zgjedhjet e ardhshme do të shkojmë pa votën e diasporës, të jeni të bindur se do të jenë antikushtetuese”, u shpreh Haçka.
Nëse kjo gjë nuk ndodh, Haçkaj thotë se çështja për votën e emigrantëve do të dërgohet në Gjykatën e Starsburgut.
“Nëse shteti shqiptar do të vendosë që ta bëjë këtë pa votë, do të jetë Strasburgu, por ka edhe përgjegjësi penale për drejtuesit e Parlamentit sipas nenit 81 të rregullores së Gjykatës Kushtetuese nëse nuk zbatohen vendimet”, theksoi ai./Opinion.al
