Dr. Eraldi është një mjek i ri i shkolluar jashtë vendit që është kthyer në punojë në Shqipëri. Ai ishte personazh i një kronike të shfaqur mesditen e sotme në TCH, ku tregohej shembulli i kundërt i mjekëve që braktisin vendin.
Erald Koçiaj tregon se është kthyer pas studimeve në Rusi dhe ka filluar punë si mjek kirurg në spitalin e Korçës. Por ajo që të habit më shumë në intervistën e tij është se ka refuzuar një vend pune në Peshkopi për shkak të gjuhës. Në fakt Ballshi i tij dhe Peshkopia flasin të njëjtën gjuhë, Shqipen, por sipas mjekut problem ishte dialekti ndaj zgjodhi Korçën. “E kam revuzuar Peshkopinë. Ju thashë e kam më të lehtë të mësoj gjermanishten se sa gegërishten”, shprehet ai.
Ndër të tjera, Erald Koçiaj thotë: Për të punuar në Rusi në një institucion shtetëror duhet të jesh shtetas rus po ashtu edhe kostoja e jetesës në Moskë është shumë e lartë. Vendosa të kthehesha sepse nuk po bëja një zgjedhje midis Moskës dhe Bangladeshit por po bëja një zgjedhje midis Moskës dhe një shteti ku unë kam lindur dhe kam të gjithë të afërmit e mi dhe mendova se ia vlente që të jepja kontributin tim këtu në Shqipëri”.
Duke krahasuar eksperiencën në Moskë dhe Korçë, ai thotë se shpeshherë i duket se po bën hapa mbrapa pasi këtu punohet akoma me metoda tradicionale për operacionet e pacientëve.
