Një iniciativë e bujshme është marrë nga kompania britanike e basteve “Paddy Power”. Ata kanë filluar të sulmojnë futbollin anglez pasi nuk i japin mbështetje komunitetit LGBT. Kompani e basteve shprehet se: “Federata angleze e futbollit nuk mbështet kauzën e futbollistëve homoseksual”.
Ndërkohë ata vazhdojnë edhe më tej teksa bëjnë thirrje për institucionet përkatëse që të krijojnë kushtet për lojtarë të cilët duan të pranojnë hapur realitetin e tyre.
“Liga e futbollit më e shikuar në botë pasqyron komunitetin që e rrethon. Në gjithë Mbretërinë e Bashkuar, një në 50 persona është pjesë e komunitetit LGBT, ndërsa në Premier Ligë nuk rezulton asnjë futbollist homoseksual. Mendojmë që edhe nëse vetëm një lojtar i Premierit arrin të zbulojë të vërtetën e tij, kjo gjë do të kishte një efekt të jashtëzakonshëm, jo vetëm për komunitetin në fjalë. U bëjmë thirrje institucioneve britanike që të punojnë më shumë, me qëllim që të krijojnë kushtet e duhura për lojtarin e parë homoseksual që do të pranojë të bëjë publike një fakt të tillë”- ka thënë një nga zyrtarët e “Paddy Power”.
