Kur shkeli për herë të parë në parlament në vitit 2013 ajo ishte 19 vjeç. Bëhet fjalë për deputeten e LSI, Kejdi Mehmetaj që tashmë nuk mund të quhet aq e re pasi po konsumon mandatin e dytë të deputetit në parlamentin e Shqipërisë. Gjithsesi deri në 2017 në formularin e dorëzuar në KQZ ajo ka deklaruar se është ende studente e Fakultetit të Inxhinierisë së Ndërtimit. Nuk dimë nëse Kejdi po i vazhdon studimet edhe këtë vit, apo e ka marrë diplomën, ajo që na bëri përshtypje ishte deklarata e saj mbrëmë në TV, ku shprehet se po të punonte në profesionin e saj do të paguhej më shumë se në parlament.
Deklarata mori shkas nga akuzat në media për dietat e deputetëve; për shpenzimet e karburantit, komunikimet telefonike si dhe dietat e udhëtimeve.
Pjesë nga debati që u zhvillua mbrëmë në emisionin e Roland Qafokut në Channel 1:
Alida Karakushi analiste politike dhe aktiviste: “Shkojmë tek zonja Kejdi Mehmetaj… Gjë e mirë që LSI merr të rinj, por kur lexoj se ka shpenzuar në vitin 2017, rreth 2.7 milionë lekë të vjetra për karburant dhe 2 milionë lekë për telefon nga taksapaguesit shqiptarë, si mund të flasim ne për shtresat në nevojë?
Kejdi Mehmetaj, deputete e LSI: Nuk është se i kam shpenzuar unë. Është pagesa mujore që merr një deputet dhe e kemi të gjithë njësoj. Deputeti çdo muaj merr pagën bazë e barabartë me pagën e një nënpunësi të nivelit të lartë, pra sa një zv/ministër dhe krahas kësaj kemi çdo muaj dieta për udhëtimet, etj. dhe e gjitha kjo nuk shkon sa rroga e… nuk di ç’të them…po të kisha punuar në profesion do kisha marrë më shumë”.
Kuvendi i Shqipërisë e paguan një deputet me pagë neto 119 460 lekë (të reja) në muaj. Krahas pagës, deputetët kanë edhe një trajtim financiar shtesë për pjesmarrje në komisione dhe veprimtari të tjera. Po kështu deputeti përfiton rimbursim 17.000 lekë në muaj për telefon; rimbursim karburanti deri në vlerën 40.000 lekë në muaj, etj.
Pyetja që shtrohet është: Sa paguhet një i sapodiplomuar për Inxhinieri Ndërtimi në Shqipëri?!
VIDEO: Deklarata e deputetes Mehmetaj për pagën dhe shpërblimet e saj
JETESHKRIMI I DEPUTETES KEJDI MEHMETAJ
/Opinion.al
