Bajern Mynih ka fituar një tjetër titull kampion në Bundesligë dhe në tre ndeshjet e mbetura, kundër Darmshtad, Lajpcig dhe Fraiburg, trajneri Karlo Ançeloti mund të eksperimentojë pa probleme me formacionin.
Por këto tre ndeshje mund të bëhen shumë të kushtueshme për bavarezët. Mjafton që në një prej tyre, në fushën e lojës të zbresë portugezi Renato Sançez dhe ata humbin 5 milionë euro. Gazeta portugeze “Record” ka zbuluar se ekziston një klauzolë në transferimin e 19-vjeçarit nga Benfika drejt bavarezëve.
Sipas saj, përveç 35 milionë eurove “bazë” që u paguan nga klubi gjerman, një shifër prej 5 milionë eurosh duhet paguar në momentin kur Sançez do të regjistrojë ndeshjen e 25-të me Bajernin. Deri tani, Sançez është ndalur në shifrën 24, mes sfidave të luajtura në Bundesligë, Kupën e Gjermanisë dhe Ligën e Kampioneve.
Tani është në dorën e Karlo Ançelotit të vendosë nëse do t’i bëjë dhuratë këto 5 milionë euro gjatë këtij sezoni Benfikës, apo në fillimin e sezonit të ardhshëm, kur Sançez pritet të jetë një titullar fiks i skuadrës.
