Guvernatori i Bankës Qendrore të Kosovës, Bedri Hamza ka folur për pensionet e veteranëve.
Ai thotë se duhet reformë e skemës aktuale në të kundërtën do duhet edhe 50 milionë euro përveç 50 milionëve që janë ndarë, gjë që sipas tij kjo nuk do të ishte e qëndrueshme për Kosovën.
Hamza paralajmëroi se nëse nuk ka reformë mbi skemën, Kosova mund të përfundojë me defiçit prej 150 milion eurosh.
“Realiteti është se nëse Skema e veteranëve të luftës dhe invalidëve të luftës nuk reformohet, shpenzimi për këtë kategori do të jetë më i madh sesa 50 milionë. Prandaj, ky Buxhet kushtëzohet me një reformë, dhe ne presim që kjo Skemë të reformohet për 3 arsye:
Së pari për të mirën e Buxhetit dhe për të mirën e qëndrueshmërisë fiskale, pa reformë të tillë do të shpenzohen 100 milionë euro në këto Skema dhe deficitet do të rriten dhe do të dalin nga kontrolli ynë. Do të mund të përfundojmë me deficit prej 150 milionë euro për vitin e ardhshëm dhe kjo nuk do të mund të jetë e qëndrueshme dhe as e dëshirueshme.
Arsyeja e dytë është që se mendojmë se vendi, shteti i Kosovës nuk do të duhej të paguante 100 milionë euro në vit për 30 vitet e ardhshme për të siguruar që të rinjtë nuk punojnë, ose që të rinjtë të punojnë në ekonominë nën hije, joformale dhe të marrin para publike.
Dhe së treti ne mendojmë që ky nuk është shpenzim i parasë publike. Kështu që për të mirën e Buxhetit dhe për të mirën e vendit, ne shpresojmë që këto skema do të reformohen”
