Guardiolës nuk i del e keqja: Gjyqtari më përjashtoi se i thashë që ishte gol

Pep Guardiola nuk ka kursyer kritikat ndaj gjyqtarit Mateu Lahoz, i cili e kishte nxjerrë trajnerin spanjoll me karton të kuq në fund të pjesës së parë të ndeshjes mes Mançester Sitit dhe Liverpulit. Sipas teknikut spanjoll, vendimet e gjyqtarëve në dy ndeshjet kishin influencuar kalimin e turit nga Liverpuli në Ligën e Kampioneve.
“Unë i thashë që ishte gol i rregullt kur topi i kaloi Sane. Kjo është arsyeja se pse më nxori me të kuq. Do të kishte qenë plotësisht ndryshe të shkonim me shifrat 2-0 në pjesën e dytë nga rezultati 1-0. Do të ishte ndryshe edhe kur goli i Salah në ndeshjen e parë do të cilësohej pozicion jashtë loje. Do të ishte ndryshe kur goli i Hesus të ishte pozicion jashtë loje apo penalltia që nuk u dha para syve të gjyqtarit.
Në këtë kompeticion, skuadrat janë aq të barabarta saqë influenca e vendimeve të gjyqtarëve është shumë e rëndësishme. Do ta provojmë përsëri në sezonin e ardhshëm. Urimet më të mëdha Liverpulit. Shpresoj që të përfaqësojnë sa më mirë futbollin anglez në gjysmëfinale.
Ne kemi kaluar 10 muaj të shkëlqyer. Duhet të rikuperojmë në aspektin psikologjik për 6 ndeshjet që na mbeten. Por kjo periudhë prej 10 muajsh është e jashtëzakonshme. Duhet të analizojmë gjërat ndeshje pas ndeshje”, tha Guardiola duke mbrojtur lojtarët e tij pas kësaj disfate. /vipsport.al./