Pep Guardiola ka deklaruar se Manchester City do të jetë klubi i fundit që ai do të drejtojë në karrierën e tij si trajner, por nuk e ka përjashtuar mundësinë e marrjes së drejtimit të një kombëtareje në të ardhmen. Spanjolli së fundmi ka nënshkruar një kontratë të re me City deri në verën e vitit 2027, çka do ta çojë atë në 11 vite në krye të skuadrës.
Guardiola ka fituar 15 trofe të mëdhenj që kur u bashkua me City-n në vitin 2016 dhe është raportuar gjerësisht se gjatë verës atij iu afrua mundësia për të marrë drejtimin e Kombëtares së Anglisë. “Do të vijë një moment kur do ta ndiej se mjafton dhe aty do të ndalem, pa dyshim”, tha Guardiola në programin Desmontadito, të drejtuar nga shefi i kuzhinës spanjoll Dani García në YouTube.
“Nuk do të bashkohem me një tjetër klub. Nuk po flas për një të ardhme shumë të largët, por nuk do të shkoj në një vend tjetër për të drejtuar një klub tjetër. Nuk do të kisha energjinë. Tani jam ende këtu, por – të nisësh gjithçka nga fillimi, gjithë procesin e stërvitjes; jo, jo, jo”, shtoi ai.
Kur u pyet nga García nëse do të merrte një kombëtare pas kësaj, Guardiola u përgjigj: “Po. Mund të ndodhë, por është ndryshe. Nuk është (stërvitje) çdo ditë, (nuk ka ndeshje) çdo tri ditë. Mendoj se do të duhet të ndalem (me drejtimin e klubeve). E imagjinoj veten si ata shefat e kuzhinës që shkojnë në vende të tjera për të parë (si funksionojnë gjërat); të ndalem për të parë çfarë kemi bërë, çfarë mund të bëjmë më mirë. Në përditshmëri nuk kemi shumë kohë për të pushuar. Është e vazhdueshme dhe mendoj se të pushoj do të ishte mirë për mua. Por jo tani, jam ende këtu (te City)”.
Manchester City ka fituar vetëm një nga nëntë ndeshjet e fundit dhe përballet me Juventusin në Ligën e Kampionëve të mërkurën.
Skuadra dukej se kishte rikuperuar formën pas një fitoreje 3-0 kundër Nottingham Forest javën e kaluar, që i dha fund një serie prej gjashtë ndeshjesh pa fitore, por u ndal në barazim 2-2 ndaj Crystal Palace të shtunën.
City aktualisht renditet në vendin e 20-të në formatin e ri të Champions League me 36 skuadra, ku vetëm tetë të parat kalojnë automatikisht në raundin tjetër.
