Pep Guardiola ka garantuar se asistenti i tij, Mikel Arteta, nuk është përfshirë në asnjë debat me sulmuesin Lionel Messi pas fitores 3-1 që Manchester City arriti të martën e shkuar ndaj Barcelonës. Pak orë pas takimit, në Spanjë u raportua se një lojtar i “Qytetarëve” provokoi argjentinasin para se të zhdukej për në dhomat e zhveshjes. “Globo Esporte” të nesërmen pretendoi se “fajtori” ishte Fernandinho, por në mbrëmje raportime nga Spanja zbuluan se në qendër të incidentit ishte Arteta.
Fernandinho i ka mohuar këto spekulime, ashtu si edhe klubi anglez në mënyrë zyrtare me një komunikatë për shtyp, por së fundmi trajneri Guardiola ka menduar të shpjegojë edhe një herë se ndihmësi i tij nuk ka lidhje me ngjarjen e komentuar.
“Fola me Artetën. Është e pamundur, ai admiron kaq shumë gjëra për Barcelonën, klubin, madje edhe Leon. Duke e njohur mirë, them se ai është një ndër njerëzit më të mirë që kam takuar në jetën time”, – deklaroi tekniku në konferencën e sotme për shtyp. “Është e pamundur që ai të ketë debatuar ashtu me një tjetër njeri të shkëlqyeshëm si Messi. E pamundur. Fillimisht ishte Fernandinho, tani është Arteta. Shohim kush do të jetë nesër. Shohim nëse ju do ta gjeni“, – iu drejtua 45-vjeçari gazetarëve.
