Ushtarakë të paidentifikuar rrethuan shtëpinë e kryeministrit sudanez Abdalla Hamdok, duke e shpallur atë në arrest shtëpie. Lajmi bëhet i ditur nga Al Hadath TV, cituar nga al Jazeera. Ministrat e industrisë dhe informacionit dhe një këshilltar i kryeministrit janë arrestuar gjithashtu.
“Qasja në telekomunikacion ka qenë e kufizuar” – thotë al Jazeera, “kështu që është shumë e vështirë të marrësh informacion mbi atë që po ndodh në Khartoum “.
Sipas burimeve të tjera, ata që kanë marr kontrollin janë ushtarët besnikë të gjeneralit Burhan, në një moment shumë delikat të tranzicionit të vendit të ndarë në dy fraksione që nga rrëzimi i ish-presidentit Omar al-Bashir. Vetëm dje grupet pro-demokratike kishin paralajmëruar për një grusht shteti të mundshëm pasi forcat e sigurisë kishin shpërndarë me gaz lotsjellës një demonstrim të pro-ushtarakëve që bënin thirrje për shpërbërjen e qeverisë tranzitore. Demonstruesit kishin bllokuar për pak kohë rrugët kryesore dhe urat e Khartoum, duke izoluar zonën qendrore nga rrethet veriore./Opinion.al
