Të tjera detaje janë zbuluar lidhur me grupin kriminal që u shkatërrua disa ditë më parë në Greqi për falsifikim të dokumenteve.
Mediat greke kanë shkruar se edhe një kriminel shqiptar kishte siguruar mjete identifikimi të falsifikuara nga grupi kriminel në Greqi. Sipas Kathimerinit, bëhet fjala për Bledar Jambellin, i cili akuzohet për vrasjen e komisarit të policisë Artan Cuku.
“Në prill të vitit 2020, një kriminel shqiptar me pseudonimin “Ricardo Muho”, me aktivitet kriminal në Spanjë dhe Greqi u soll para hetuesve në Pire për një rast të kontrabandës së cigareve. “Muho” ishte në atë kohë në një burg grek, i akuzuar si autori i vrasjes së ish-oficerit të policisë shqiptare Artan Cuku, tre vjet më parë në Tiranë. Ky i fundit kishte namin si i pakorruptueshëm, pasi në 20 vitet e shërbimit të tij çoi në burg rreth 1000 kriminelë shqiptarë. Një prej tyre ishte “Muho”, i cili akuzohej nga autoritetet shqiptare se kishte urdhëruar vrasjen e komisarit në këmbim të një shpërblimi prej 20 mijë eurosh”-shkruan media greke.
Ndër të tjera Kathimerini bën të ditur se deri në dhjetor 2018, “Muho” fshihej në Athinë duke përdorur një kartë identiteti dhe pasaportë false nën identitetin “Christos Hamkidis”. Dokumentet e falsifikuara ishin blerë për 35 mijë euro nga qarku i falsifikimit që u godit në mes-javën e shkuar nga Shërbimi i Punëve të Brendshme të Policisë greke.
Të paktën 20 persona u arrestuan në Greqi mbrëmjen e së martës gjatë aksionit policor për të goditur grupin e falsifikatorëve të pasaportave. Grupi i falsifikatorëve u ofronin shtetasve të huaj letërnjoftime dhe pasaporta të falsifikuara me çmime që fillonin nga 30 mijë euro e lart. Shumica e atyre që përfitonin dokumente false ishin persona me precedentë penal.
Nga hetimet ka rezultuar se grupi i falsifikatorëve ka nisur aktivitetin që nga 26 prilli i vitit 2013 dhe përbëhej nga grekë, ish-punonjës policie, policë dhe nëpunës të tjerë të shtetit grek. 9 prej të arrestuarve janë policë në detyrë. Shumica e oficerëve të policisë të përfshirë thuhet se janë të lidhur me komisariatet në pjesën perëndimore të rajonit të Atikës në Athinë./Opinion.al
