Një 50-vjeçar grek u gjet i varur mbrëmjen e djeshme në apartamentin e tij në Moschato por ajo që në dukje ngjante vetëvrasje, sipas mediave greke, kishte detaje të dyshimta.
Një 47-vjeçare po merret në pyetje nga autoritetet greke si e përfshirë në vdekjen e tij.
Kamerat e sigurisë kishin fiksuar gruan e cila kishte mbërritur në banesën e tij pak para se të ndodhte ngjarja.
Gruaja ka deklaruar në polici se 50 vjeçari i kishte rreth 200 mijë euro borxh dhe se ata njiheshin prej 10 vitesh. Mes tyre kishte patur vetëm marrëdhënie pune.
Në të njëjtën kohë, sipas informacioneve të ERT-së, të shtunën e kaluar persona që kishin investuar para tek ai kanë shkuar në zyrën e 50-vjeçarit në Kallithea dhe e kanë dhunuar. Në vendngjarje është thirrur edhe policia.
Sipas të njëjtave informacione, bashkëshortja e 50-vjeçarit, me origjinë nga Shqipëria, ka pasur akses në llogaritë e tij bankare, ka tërhequr para dhe është larguar nga banesa ku ata jetonin.
Më pas pasoi dhuna ndaj kontabilistit dhe fundi tragjik, ku u gjet i varur në shtëpinë e tij.
Sakaq, gruaja 47-vjeçare që po merret në pyetje u pohoi oficerëve se në takimin e saj të fundit me kontabilistin ai kishte qenë i dëshpëruar pasi nuk kishte ku të gjente paratë e marra borxh nga investitorët.
Gjatë takimit, sipas 47-vjeçares, ka ndodhur një përleshje, gjatë së cilës, siç pretendon ajo, 50-vjeçari ka marrë një kordon dhe ka kërcënuar se do vriste veten.
“Nuk duroj dot më, do vras veten”-i ka thënë ai gruas.
Më pas ajo i kishte tëhequr një karrige pranë duke e nxitur 50 vjeçarin t’i jepte fund jetës së tij.
“E ndihmova, i shtyva karrigen ”-tha ajo.
Në fakt, pak minuta para se të takonte viktimën, 47-vjeçarja është regjistruar nga një kamer sigurie, ku duket se është duke ecur me nxitim, duke kërkuar vendin e saktë të shtëpisë së kontabilistit.
Ajo që po shqyrtohet nga policia greke është nga njëra anë pretendimi i 47-vjeçares se ka pasur mosmarrëveshje financiare dhe nga ana tjetër nëse ka pasur një person të tretë në apartament ne Moschato.
