81-vjeçarja, Zinaida Kononova, ka bërë xhiron e mediave botërore me historinë e saj krejt të pazakontë. E moshuara u kthye në jetë pasi kaloi natën në morg, duke shokuar stafin e spitalit dhe të afërmit.
Kononova u deklarua e vdekur pas një operacioni në zorrë në 14 gusht. Ajo u dërgua në morg në orën 1 të natës, por në orën 8 të mëngjesit u gjet e shtrirë në tokë nga një infermiere. E moshuara nga Rusia ishte rrëzuar në përpjekje për t’u larguar nga morgu, ndërkohë që infermierja nisi të ulërinte nga tmerri.
Mjeku i turnit mendoi fillimisht se infermierja po kalonte një atak paniku, por e kuptoi situatën kur pa që 81-vjeçarja po lëvizte.
Mjekët i thanë mbesës së Kononovës se gjyshja e saj kishte vdekur klinikisht për 15 minuta dhe më pas kishte ndodhur mrekullia.
Nga hetimi u zbulua se doktori dhe anestezisti e kishin dërguar në morg të moshuarën 1 orë e 20 minuta pasi e deklaruan të vdekur, duke mos respektuar rregullin e dy orëve./Opinion.al
