Liz Truss është shpallur kryeministrja e re e Mbretërisë së Bashkuar pasi fitoi garën kundër Rishi Sunak. Ajo do të zvendësojë Boris Johnson, i cili dha dorëheqjen në fillim të korrikut pas një revolte që shpërtheu në partnë e tij pas një sërë skandalesh.
Truss do të jetë gruaja e tretë që do të udhëheqë qeverinë e Mbretërisë së Bashkuar pas Margaret Tharcher dhe Theresa May. Po kush është Liz Truss?
47-vjeçarja ka lindur në 26 korrik 1975 në Oksford. Ajo është bijë e një profesori matematike dhe një infermiereje.
Truss vazhdoi studimet për Filozofi, Politikë dhe Ekonomi në Universitetin e Oksfordit, ku ishte aktive në politikën studentore – fillimisht për Liberal Demokratët, përpara se të kalonte te Konservatorët.
Ajo punoi si kontabiliste në kompaninë e naftës dhe gazit Shell, si dhe në kompaninë e telekomunikacionit Cable & Wireless.
Në vitin 2006 ajo u zgjodh këshilltare në Greenwich përpara se të bëhej deputete në 2010.
Zonja Truss ka mbajtur poste të rëndësishme. Më parë ka qenë sekretare e shtetit për drejtësi dhe më pas sekretare e shtetit për tregtinë ndërkombëtare. Në vitin 2021, ajo u emërua si Sekretare e Jashtme, duke u bërë gruaja e dytë që mban këtë post në Mbretërinë e Bashkuar.
Ajo votoi kundër largimit të Britanisë së Madhe nga Bashkimi Evropian por pas referendumit ajo nisi të mbështesë fuqishëm procesin Brexit.
Truss i qëndroi besnike ish-kryeministrit Johnson deri në fund ndërsa të gjithë ministrat e braktisën, duke fituar pëlqimin e besnikëve të ish-kryeministrit.
Ajo është martuar me financierin Hugh O’Leary dhe është nënë e dy fëmijëve.
